२७ फागुन ,काठमाडाैं । देशभरका ७५३ स्थानीय तहहमध्ये केहीले स्थानीयवासीलाई पालिका सरकारको आभास दिलाउन नसकेका गुनासो सुनिन्छ । आन्तरिक विवाद र दलीय भागबण्डामा अल्मलिएर चालु आर्थिक वर्षको बजेटसम्म ल्याउन नसक्ने पालिकाहरुबाट नागरिकले धेरै अपेक्षा राख्नु पनि मूर्खतासिवाय केही होइन।
तर केही स्थानीय तहहरुले केन्द्रले नदेखेको स्थानीय समस्याहरु पहिचान गरेको छन् । उनीहरुको समस्याहरु औँल्याएर समाधान गर्न लागिपरेका पनि छन्। यस अर्थमा केही पालिकाहरुले गाउँ—गाउँमा सिंहदरबार पु-याएको महसुस जनतालाई दिलाएका छन् । जनताको सुःख दुःखका सारथी बनेका छन्।
मधुवन नगरपालिकाले चालु आर्थिक वर्षमा पालिकावासीको मर्का र आवश्यक्ताअनुसार बजेट ल्याएर काम सुरु गरेको बताएको छ ।
यसै पालिकाका नगर प्रमुख तेजबहादुर भाटसँग वडा खबरले गरेको कुराकानी
कार्यकालको प्रारम्भमा के -कस्ता योजनाहरु अगाडि बढाउनुभएको छ ?
हामी मधुवन नगरपालिकामा निर्वाचित भएर आएको दश महिना वितेको छ । सुरुवाती समयमा हामी आर्थिक वर्ष २०७९ र ८० को नीति तथा कार्यक्रम बनाउँदैमा व्यस्त भयौं । अहिले हामीले सडकका टेन्डर खुलाएका छौं ।
कृषि, शिक्षा, स्वास्थ्य, सडक र पर्यटनलाई प्राथामिकतामा राखेर हामीले बजेट बनाएका छौं । अहिले हामी योजना बनाउनेमै व्यस्त छौं।
जनताको आर्थिक स्तर सुधार्नका लागि हामीले कृषिलाई पहिलो प्राथामिकतामा राखेका छौं । कृषिमा पनि खेतीलाई भन्दा पशुपालनलाई बढी महत्व दिएका छौं। फलफूल र तरकारीको उत्पादनमा वृद्धि गर्ने हाम्रो लक्ष्य छ । मधुवनलाई कृषीमा आत्मनिर्भर बनाएका छौ ।
कृषीलाई व्यवसायिमुखी बनाउने. लक्ष्य राखेर अगाडी बढिरहेका छौं । वर्षदेखि लाल पुर्जा विहिनका लागी लाल पुर्जा दिने कार्यक्रम अगाडि बढाएको छौ ।
यसमा प्रदेश र संघसँग पनि छलफल र माग गरिरहेका छौं । मधुवन क्षेत्रको व्यवस्थापन राम्रो बनाउन हामी लागिपरेका छौं।
बाढी तथा जंगली जनावर यहाँको समस्या रहेको छ । जंगली जनावरले बालीनाली खाई दिने जंगलीजनावरलाई मार्न पनि नपाइने नियन्त्रण गर्न पनि नपाइने नियम छ । वर्ष दिन खानका लागि खेती लगायो, सबै जनावरले खाइदिन्छ ।
यसबाट जोगीन त्यो हुनाले हामीले केही हदसम्म नियन्त्रण गर्न लागीरहेका छौं । जंगली जनावरले क्षती नपुयाने बाली नालीको पहिचान गरी सो अनुरुप खेती गर्ने योजना बनाउन लागेको बताउनुभयो ।
मधुवन नगरमा विकास निर्माणमा के कस्ता चुनौतीहरु रहेका छन् ?
हामीले जेठ ९ गते कार्यभार सम्मालेका थियौं । जेठ १० गते नै मैले प्रदेश सरकारका मन्त्रीहरुसँग भेटेर केही योजनाहरु टिपाएको थिएँ । त्यो अनुसार केही योजनामा प्रदेशले बजेट हालेको छ ।
प्रदेश र संघले योजनाहरु नदिए हामीलाई विकास गर्न निकै कठिन हुन्छ । एउटा विडम्बना के छ भने स्थानीय तहसँग जम्मा ११ प्रतिशत बजेट हुन्छ । प्रदेशसँग १९ प्रतिशत हुन्छ ।
संघसँग ७० प्रतिशत हुन्छ । त्यसो हुनाले केन्द्र सरकारले योजना हालेन भने केही पनि विकास हुन सक्दैन । हामी केन्द्र र प्रदेशसँग यहाँको आवश्यक्ताहरुको बारेमा जानकारी गराइरहेका छौं । यो कार्यकालमा कुनै वर्ष कम बजेट परे पनि अर्को वर्ष राम्रो योजनाहरु पार्ने हाम्रो प्रयत्न छ ।
हाम्रो पालिका भौगोलिक रुपमा विकट छ । जनताको अपेक्षा धेरै र बजेट कम छ । सडकको अवस्था भद्रगोल छ । वडा नम्बर २ मा जंगली जनावरको प्रकोप धेरै छ । बाह्रै महिना चल्ने बाटो बनाउनु पर्ने छ ।
वडामा र पालिकामा उत्पादन भएका वस्तु बजारसम्म पु-याउन सक्ने अवस्था छैन । पालिकाको बजेट चालु खर्चमै सकिने अवस्था हुन्छ । सिँचाइको र खानेपानीको पनि समस्या छ । यसको लागि धेरै बजेट आवश्यक पर्छ ।
त्यसो हुनाले यहाँको विकास गर्न यस्ता चुनौतीहरु छन् । तर पनि हामी यी चुनौतीहरुको सामना गर्दै मधुवनमा समृद्धि ल्याउन अगाडि बढेका छौं ।
स्थानीय तहमा भएका अनियमितताका कुरा पनि बेलाबेला सुन्ने गरिन्छ । मधुवनमा भ्रष्टाचारलाई हुन नदिन के गर्नु हुन्छ ?
२०७४ को निर्वाचनबाट स्थानीय तहमा साथीहरु जितेर आउनुभयो । केही पालिकाहरुले अनियमितता पनि गरे । गाउँगाउँमा सिंहदरबार पु¥याउने भनियो । तर राजाहरु उत्पति भएको जस्तो हामीले पनि महसुस गरियो । नामको मात्रै सिंहदरबार गाउँगाउँमा आयो, तर स्रोत—साधनले पुगेन ।
स्रोत साधन र अधिकार नदिएर सिफारिस गर्न मात्रै स्थानीय तहलाई दिएर गाउँ—गाउँमा सिंहदरबार पुग्दैन । स्थानीय तह र प्रदेशलाई संघले कुनै दौड प्रतियोगितामा हात, खुट्टा बाँधेर दौडिन जा, भनेजस्तो भएको छ ।
स्थानीय तहमा भ्रष्टचार भयो भन्ने कुरा एकदमै व्यापक रुपमा उठेको कुरा हो । अरु पालिकाहरुले के गर्छन् मलाई थाहा छैन । तर म हाम्रो मधुवन नगरपालिको यो कार्यकालमा १ रुपैयाँ पनि भ्रष्टचार गर्दिन र गर्न दिन्न ।
हामीले हरेक काम नियम र प्रक्रिया अपनाएर गर्दा अनियमितता हुन पाउँदैन । म राजनीतिलाई व्यापार बनाउन हुँदैन भन्ने मान्यता राख्ने मान्छे हुँ ।
जनप्रतिनिधि बन्नु भनेको बिलकुल समाज सेवा गर्न बनेको हो । म निरन्तर रुपमा समाज सेवामा थिए अहिले झनै जनताले मन र मत दुवै मलाई दिनुभएको छ ।
म लगातार निरन्तर रुपमा समग्र पालिका प्रतिनिधि हु जनताको सेवा गर्नुका लागी यो नगर प्रमुखको पद पाएको हो गर्भका साथ जनताको सेवामा लागेको छु । यो पाँच वर्षमा म नियममा रहेर काम गर्ने छु। हाम्रो पालिकाको हरेक गतिविधि नियम र प्रक्रियामा हुने छन् ।
स्थानीय तहले बजेट निर्माण गर्दा निमुखा, उत्पीडनमा परेकाहरुको मागलाई वास्ता नगरी टाठा—बाठाहरुको अनुकूल बजेट बनाउँछ भन्ने पनि सुनिन्छ नी ?
तपाईँले एकदमै सही कुरा उठान गर्नुभयो । हामीले यो वर्ष नीति तथा कार्यक्रम बनाउँदा, योजना छनोट गर्दा टोल—टोलमा सबै मान्छेहरु भेला गरेर तथा वुद्धिजिविहरु संग सबैको आवश्यक्ता टिपोर्ट गरेका छौं ।
त्यो आवश्यक्ताहरु वडामा लगेर ती मध्येका पनि महत्वपूर्ण आवश्यक्तालाई छनोट गरियो । वर्ष दिन पुगेको छैन हामी आएको जनताका सबै अपेक्षा पूरा गर्न सकिँदैन ।
त्यसो हुनाले हामीले जनतालाई तत्कालै पूरा गर्नु पर्ने मागहरुलाई महत्वमा राखेर बजेट विनियोजन गरेका छौं । हामी यो पाँच वर्षे कार्यकालमा सबै जनतालाई चित्त बुझ्ने गरी काम गर्ने छौं ।
यो कार्यकालमा मधुवन नगरपालिकामा भ्रष्टचार भएन । तर काम राम्रो भयो भनेर जनताले महसुस गर्ने गरी हामीले काम गर्ने छौं
शिक्षा क्षेत्रको विकासका लागि के पहल गर्नुभएको छ ?
तुलनात्मक रुपमा यस नगरपालिकामा रहेका विद्यायलको शैक्षिक अवस्था राम्रै छ । तर, भनेअनुसार विकास हुन सकेको छैन । शिक्षामा सुधार होइन अब क्रान्ति गर्नुपर्छ भनिरहेको छु । पराम्परागत शिक्षा प्रणालीमा व्यापक परिवर्तनको आवश्यकता छ ।
बर्दियामा तपाई सन्त नेताका रूपमा परिचित हुनुहुन्छ । घर,परिवार नभनिकन निरन्तर समाज सेवामा नै जीवन व्यतित गर्नु भएको छ। तछाड, मछाड नगरिकन नगर मेयरमा जितेर आउनुभयो, तपाईं भन्दापछि उदाएकाहरु काहाँ पुगे ? कहिले गुनासो भएन ? म पछाडि छुटे जस्तो महसुस भएन ?
जनप्रतिनिधिले हामी सेवक हौं भन्ने कुरा व्यवहारमा देखाउन सक्नुपर्छ म निरन्तर रुपमा लागी रहेको छु जनताको सेवामा मलाई नगर प्रमखको पद पनि मागेको थिईन साथीभाईहरुको मायाले गर्दा आज समग्र नगरबासीको सेवा गर्ने अवसर पाए यो मेरो अहोभाग्य हो।
जनताले म प्रति विश्वास गर्नु भएको छ ,जनताको त्यो विश्वासलाई टुट्न दिनेछैन । नगरको चौतर्फी विकासको लागि पालिकामा म सदैब लागि परिरहने छु ।
मलाई सत्ता ,पद आदि कुनै कुराको मोह छैन निरन्तर सेवामा लागी परेको छु । कहिले तछाड, मछाड गर्न जानिएन र त्येस्तो गर्न आफ्नो नैतिकताले कहिल्यै दिएन । म मेरो जिवन जनताकै सेवामा समर्पित गर्न छु ।
उहाँले भन्नुभयो, ‘राजनीति जिवन र आफ्नो जिवनको निकै ठूलो त्याग, मेहेनत र संघर्षबाट म यहाँसम्म आइपुगे, अझै पनि जनताको सेवक भएर सेवा गर्ने अठोट छ, जनतालाई गरेको बाचाबाट निराश हुन दिनेछैन । यो मेरो जिन्दगीको संक्ल्प हो। म सदैव जनताको सेवामा जिवन निर्वाहा गर्ने छु यो मेरा लागि अवसर हो ।’
जनताबीचको सम्बन्ध सुमधुर बनाउन के गर्दै हुनुहुन्छ ? के गर्ने योजना छ ?
स्थानीय सरकार र स्थानीय जनताबीचको सम्बन्ध एकै भान्सामा खाना खाने परिवारको जस्तो हुनु पर्छ । त्यसो हुनाले जनप्रतिनिधिले टाठा—बाठाको कुरामा मात्रै विश्वास नगरी स्थानीय वासीको कुरा सुन्ने गर्नु पर्छ हामी त्यही गर्दै छौं। समय—समयमा टोल—टोलमा पुगेर छलफलहरु गर्ने छौं । प्रत्यक्ष रुपमा जनताको गुनासो सुन्ने छौं ।
हामी जनप्रतिनिधि र जनता सबैको सपना मधुवनलाई समृद्ध र सुन्दर नगरपालिका बनाउने हो । यो उद्देश्यमा हामी सबै एक जुट भएर जाने छौं । यसमा हामीलाई जनताको भरपुर साथ र सहयोग रहन्छ भन्नेमा विश्वास छ ।
अन्त्यमा समग्र नगरबासिलाई के भन्न चाहानुहुन्छ ।
मधुवन नगरबासी प्रति पुर्ण आभारी छु । मलाई अमुल्य भोट दिएर नगर प्रमुखमा जिताउनु हुने सम्पुर्ण नगरवडाबासीहरुलाई विशेष धन्यवाद दिन चाहान्छु । जसरी जनताले म प्रति विश्वास गर्नुभएको छ, जनताको त्यो विश्वासलाई टुट्न दिनेछैन ।
सम्पुण नगरबासीलाई नगरमा समेटेर नगरबासीको मनोभावना बुझेर सोहि अनुरुप काम इमान्दारिताका साथ लागी परिरहने चौबिसै घण्टा नगरबासीका समस्या समाधानमा लाग्ने प्रतिबद्धता जनाउन चाहन्छुु ।
जनताको सुझाव र आवश्यकता पहिचानका आधारमा योजना अगाडी विकास गर्दै लगिने नगरको चौतर्फी विकासको लागि पलिकामा म सदैब लागि परिरहने छु ।
हामी जनप्रतिनिधि पालिकाको समस्या समाधान गर्दै सुन्दर गाउँ निर्माणमा लागेका छौं । यो कार्यमा जनताको भरपुर साथ सहयोगको अपेक्षा गरेका छौं । पालिकाको काममा साथ दिनुहोला । कमि—कम्जोरी औंल्याई दिनुहोला । नविन ऊर्जाका साथ काम गर्दै छु । यही भन्न चाहन्छु । धन्याबाद
पालिकामा जम्मा बजेट १ अर्व ७ करोड रहेकाे छ । धेरै बजेट निकासा भएकाे शिषर्क पुर्वाधार रहेकाे प्रमुख प्रशासकीय अधिकृत (कार्यालय प्रमुख) धर्मराज न्यौपानेले जानकारी दिनुभयाे।
